Agrico + sonkrag + gravitasie = ’n besproeiingsdroom

Langs die Vaalrivier in die Noordwes-Vrystaat boer die broers Carl en Cawood Crous op die plaas Waterford buite Viljoenskroon met mielies, sojaboon, sonneblom, koring en ’n Draughtmaster-stoet. Hulle maak van aanvullende besproeiing gebruik. 

Dít na hulle weens uitdagings soos beurtkrag vir die soveelste keer met ’n mooi oes op die land gesit het, maar nie in staat was om te besproei nie. So is die besluit geneem om met Agrico hande te vat vir ’n unieke, pasgemaakte besproeiingstelsel.

’n Droom word werklikheid

“Ons droom om ’n pompstasie te bou wat dit moontlik maak om te besproei wanneer die rivier in vloed is of nie, kon waar word. Ons het ’n groot dam op die plaas gebou wat as battery dien en enorme kragbesparingsvoordele inhou,” verduidelik Carl.

Johann Marnewick, Agrico-takbestuurder van Lichtenburg, en André van Jaarsveld, besproeiingsontwerper by Agrico, het saam met Carl en Cawood die vorige besproeiingstelsel omgeskakel van ’n stelsel met verskeie onttrekkingspunte na ’n stelsel met slegs een onttrekkingspunt waar die dam en ’n sonkragstelsel geïnkorporeer kon word. Deeglike voorafbeplanning is met behulp van hommeltuigfoto’s van die omgewing gedoen.

Cawood vertel hoe water met ’n sonkragstelsel uit die onttrekkingspunt vanuit die rivier oor 2,4 km (via ’n 500 mm-deursnee pyp) na die dam gepomp word. Die hoë ligging van die dam maak dit moontlik om water na die spilpunte te graviteer. “Ons is geseënd dat ons die natuur tot ons voordeel kan gebruik.”

As lede van NERSA kan hulle oortollige krag wat met die sonkragstelsel opgewek word, na die elektrisiteitsnetwerk (grid) terugstoot wat weer later onttrek kan word. Die totale besproeiingstelsel word van die selfoon af bestuur en gemonitor waar kleurkodes aandui wat die presiese stand van sake is. Geen meer rondry met bakkies van die een pomp na die ander nie.